TRAVELBUCKET

BETOWERENDE BOTSWANA

Ons kom Botswana binne by Ramatlabama Hek (06:00-22:00) en kies  koers in die rigting van Gaborone en dan oor Serowe na Khama Rhino Sanctuary waar die Botswana regering ‘n teëlprogram het vir swart renosters.    Hier by Khama Rhino Sanctuary kwetter die  voëls  in die bome en die bokke kom loop sommer mak hier om jou staanplek rond in die aand terwyl kos aan mekaar geslaan word en die son rooi sak in die Weste.

Gepantser teen die koue en met groot opgewondenheid neem ons my 76-jarige ma, wat nog nooit op ‘n aand  game drive was nie, uit in die veld!  Wat ‘n belewenis was dit nie vir haar.  Absoluut die moeite werd om die rit aan te pak en ouma bo-op die wildkyk voertuig te kry.

Picture 042

Ouma op die night game drive

En soos wat dinge nou maar is, is die geluk nie aan ons kant nie, want as gevolg van ‘n wildtelling aksie wat gehou word die naweek toe ons daar kamp sien ons nie een van die imposante diere nie!  So nog ‘n goeie rede om met ‘n volgende besoek aan Botswana weer by Khama Rhino Sanctuary ‘n draai te kom maak.

Kubu Island experience

Kubu Island experience

Kubu Island (nog ‘n bucket list item) is nie ‘n idilliese tropiese eiland nie, maar ‘n imposante kremetart boom eiland in die middel van die Makgadigadi panne.      Maak jou maar reg vir ‘n stadige stowwerige rit tot by die kampplek wat  ‘n oop stukkie aarde onder ‘n eeuoue kremetart is waar jy jou eie stort moet ophang (daar is geen ablusie blokke nie) en  die luukse van ‘n long drop het.  Onthou die reël hier is:   alles wat jy in neem moet jy weer saam met jou uitneem!  Die in neem sluit ook jou water in en die uit neem sluit jou vullis in.

Slow and dusty road

Slow and dusty road

Hier moet jy stil wees om die statige kremetarte te waardeer.  Ons raak aan die slaap met die maan en die sterre wat nog helder hier op ‘n wolklose nag skyn met geen misdaad om oor bekommerd te wees nie.  Salig!

Dan vat ons die pad noord vanaf Nata na Kasane wat  ‘n ritme van sy eie het.  Gou kry jy die eerste bordjie wat jou waarsku teen olifante en dan ‘n entjie verder aan, sommer hier langs die pad, sien jy die olifante, buffels, hiënas en kameelperde rustig aan die wei terwyl ander hulle tyd neem om die pad te kruis.  Afrika tyd in werking.

On the 300km stretch from Nata to Kasane

On the 300km stretch from Nata to Kasane

Afrika lewer interessante mense op en ook Kasane het geen tekort aan die karakters nie  –  van die budget overlander tot die gesofistikeerde tannies in wit (minder prakties in Afrika) safari klere met blink diamante aan die vingers en die wilde diere wat die strate bewandel.  Terwyl jy gou winkel toe gaan om jou brood en melk te gaan koop kan jy langs die pad ‘n paar wilde diere besigtig.  En net daar kruip Kasane in my hart.

'n Interessante karakter

‘n Interessante karakter

Nadat jy jou tentjie langs die Chobe opgeslaan het mik jy teen sononder na die rivier om die groot verskeidenheid diere asook die son vanaf een van die talle bote te gaan bewonder.  Met winkels soos Spar en Choppies om van te kies is Kasane ‘n goeie plek om voorrade aan te vul voordat jy die wildernis invaar na woeste plekke soos Moremi en Savuti.

Chobe magic

Chobe magic

Maar dit is weer tyd vir tent opslaan en die  pad te vat via die Caprivi na Kalizo Lodge in Namibia om ‘n tiervis (of twee) te vang in die Zambezi.  Hier kamp jy letterlik op die walle van die Zambezi rivier,  bewonder die kleurvolle voëllewe en word bederf met ongelooflike sonsondergange.  Dit is lekker om Afrika MY plek te noem!

On the banks of the Zambezi

On the banks of the Zambezi

Dan Guma Lagoon toe in die Okavango Delta.  Die sandpaadjie vanaf die afdraai by Etsha 6 tot by die Eden van Guma Lagoon hou plek-plek self al ‘n uitdaging of twee in afhangende van watter tyd van die jaar jy gaan en natuurlik die vaardigheid van die bestuurder.  Die watervlakke van die delta verander voortdurend en is die paadjie soms met jou gaan en terugkeer verskillend.   So volg maar die paaltjies om jou pad te vind. Man, hier raak dit nou lekker!

Guma Lagoon camp

Guma Lagoon kamp

 En as jy ‘n voëlkyker is kan jy sommer  ‘n hele paar voëls soos onder andere die skaars  hamerkop op jou voël lysie afmerk.  Guma Lagoon is voorwaar ‘n voël kyk en Tiervis vang paradys.  En as jy nie een van die twee doen nie, chill maar sommer net by Guma en lees ‘n boek.

Teen vroeg oggend is ons reg en vaar uit op die delta met ons plaaslike gids.  Ons poler vat ons metn mokoro dieper en dieper die delta in. Geluidloos vaar ons vir ‘n dag lank tussen die papirus eilande waar olifante geruisloos beweeg en besef ‘n mens weereens die wonder van die Skepping.  Hier is baie voël lewe en sien ons selfs ‘n klein krokodilletjie reg langs die mokoro! (Nota aan self:  moenie hier swem nie).   En as daar kleintjies is moet daar seker iewers ‘n ma ook wees …?   Maar hier in die delta het selfs die moderne samelewing al ingeskop want deesdae word ‘n mokoro van  veselglas gebruik in plaas van die ou hout soort omdat dit meer gebalanseerd en duursaam is.  Aan die eenkant is dit goed,  want dan word die groot ou reuse darem tog gespaar.  En volgens ons poler, wat dit al van kleins af doen, is die balans van die kommersiële mokoro’s beter as die tradisionele hout mokoro.

mokorro collage

In the delta

Ons reis is nog nie klaar nie en ons volgende kamp is by Mankwe wat op die rand aan die suid-ooste kant van Moremi geleë is.  Ons is die enigste kampeerders by Mankwe.  Vroeg die oggend pak ons, ons dag se goedjies en vat  die kaplyn pad tussen die mopanies deur na Moremi se North Gate toe.  Dit gaan stadig.  ‘n Olifant neem tydsaam haar oggend wandeling en volg ons en ‘n vlakvark hardloop op ‘n veilige afstand om haar nie te ontstel nie.  Dit is haar wêreld en ons is die besoekers!

Kaplyn pad

Kaplyn pad

Some of the Moremi sightings

 Terug by die kamp die aand braai ons ‘n vleisie (soos dit ‘n Suid-Afrikaner betaam), maar word ons gou herinner dat dit wilde Afrika is wanneer ‘n trop hiënas ons geselskap kom hou en al die water pype in die kamp stukkend byt op soek na water.  Dit beteken geen stort vanaand nie.  Na ‘n lang dag, met baie opwinding onder die Afrika son, klim ons maar stowwerig en moeg in die bed en raak onder die helder sterre aan die slaap.

Te gou is ons vakansie verby en is dit huiswaarts keer met die Trans Kalahari via Ghanzi  en by die De Beers dorp van Jwaneng,  waar  een van die wêreld se rykste diamantmyne geleë is, stop ons gou om ‘n geocache te doen om die pad bietjie korter te maak en die verveling in toom te hou.

Op Gaborone moet ek my ander helfte op die lughawe aflaai om weer te gaan werk in sy geliefde Afrika.  Tevrede dat ek nog ‘n item of twee op my travel bucket kon afmerk vat ek die lang pad oor landsgrense alleen huis toe. Terug na die roetine by die huis en tot ‘n volgende keer …

“The world is full of magic things, patiently waitingfor our senses to grow sharper.”
—–    W.B. Yeats

Leave a Comment

Your email address will not be published. Required fields are marked *

Social Share Buttons and Icons powered by Ultimatelysocial
Instagram